Қазақтелеком шағын және орта бизнес өкілдерімен офтейк-келісімшарттар жүйесін енгізу мәселесін талқылады

Отандық тауар өндірушілерді қолдап, дамыту мақсатында «Самұрық-Қазына» қорының қолдауымен «Самұрық-Қазына Келісімшарт» ЖШС-мен бірлесіп ұйымдастырылған кеңеске жетекші қазақстандық компаниялардың 70-тен астам өкілі қатысты.

«Отандық өндірушілерді қолдау Қазақтелеком үшін стратегиялық тұрғыда басым бағыт болып табылады. Компания телекоммуникация жабдығын өндіретін қазақстандық ұйымдардың ұсыныстарын қарауға дайын, бұл жергілікті өндірісті қолдап қана қоймай, бизнес үшін жаңа мүмкіндік ашады», - деп атап өтті «Қазақтелеком» АҚ «Телеком комплект» дирекциясының Бас директоры Мұрат Сәрсекеев.

Басқосу барысында «КС link» ЖШС және «PowerTech» энергетикалық шешімдер зауыты сияқты қазақстандық өндірушілермен ынтымақтастық және өзара іс-әрекет туралы меморандумдарға қол қойылды. Бұл келісімдер отандық компаниялардың нарықтағы рөлін нығайтып, елдің телекоммуникациялық инфрақұрылымына инновациялық шешімдерді енгізуге сеп болмақ.

Қазақтелеком өз кезегінде отандық өндірушілерге барынша қолдау көрсетіп, оларға өсіп-өркендеуге мүмкіндіктер береді, бұл өз кезегінде Қазақстан экономикасын нығайтады.

«Қазақтелеком» АҚ Коммуникациялар және брендті дәріптеу департаменті